日期：2019年1月24日
媒體：立場新聞
【文：阿思】
初見志偉，是在香港展能藝術會－賽馬會共融藝術工房。他來上歌唱工作坊，是新參加的朋友，人很客氣友善，對課堂也很投入，一唱歌，感情豐富，像用歌聲向聽者訴說心事一樣。
日子久了，他對工房環境漸漸熟悉，也多認識了其他參加的朋友。每星期一次的課堂，他每次準時來到，與各人打招呼，閒話家常。老師來到，專心上課，認真唱歌。
一次與他閒聊，問他為何這麼喜歡唱歌，「細個嘅時候已經喜歡聽歌，覺得音樂可以抒發感情。跟住返教會，接觸多咗，就更鍾意啦！咪去參加詩班。認識多咗，就想學埋樂器嘞，長笛易拎，咪學長笛囉，中間又有學過吓中國笛子。」志偉坦率道來。
我這才知道他對音樂有這些追求，看着眼前的他，忍不住問：「現在眼睛哩個情況，仲有繼續學長笛或者中國笛子嗎？」「無啦。不過仲有繼續玩，係教會都仲有幫手伴奏架！」
知道他還有繼續玩樂器，我雖然也替他高興，但不禁疑惑，「你宜家對眼睇到譜嗎？仲有幾成視力？」「睇唔到嘞。睇到幾多要視乎環境，日光底下會好啲。一般嚟講，視力已經低於一成。」
對於視力正常的我，實難以想像眼睛看不見的生活是如何的，本來很想多問他眼睛的情況，又不知會否觸及他的情緒，話在嘴邊不敢說出來。我唯有就他玩音樂的情況再問：「咁宜家要學一首曲的話，你點學？」「靠聽，用心聽，跟住用心記囉﹗」「咁會唔會學好耐？」「會呀，比以前用多咗時間，但係宜家靠聽同記，我覺得自己反而認識多咗音樂，會聽到音樂、歌詞嘅意境同結構，邊個係轉折位，轉調又轉快咗。我覺得自己對音樂嘅認識係深咗架。」
原本以為會聽到他灰心地訴說困難，卻聽到這樣正面的回應，我膽子大了。「你對眼點解睇唔到嘢嘅？係幾時嘅事？」「都十年八年前啦，但係三四年前開始衰退得好快，近一兩年嚴重咗……」「係意外？定係乜嘢病？」「係遺傳病，我哋一般簡稱RP，中文名係視網膜色素病變。」
「咁原本睇到嘢，變成越睇越差，甚至睇唔到，心情係咪好差呀？」
「都唔係。因為我年青嘅時候已經知自己有哩個病，無論心理定經濟上都有準備啦！不過初初開始衰退嘅時候，睇唔到書、報紙，心情當然就唔太好啦。」
他平靜的心情讓我佩服，但也有疑問，「但係睇唔到嘢，對生活多多少少都會有影響架喎，係嘛？」「哩個當然有，剩係睇唔到書，睇唔到譜，已經同以前唔同啦，係要適應嘅。醫生其實有轉介我去一啲視障人士嘅復康服務，但我一開始時唔接受，覺得自己可以應付到。」他停一停，再續：「近嚟方向感差咗，又容易撞到嘢，就去試吓哩啲復康服務，又喺當中識到其他視障嘅朋友，就慢慢接受了。」
從他踏實淡然的聲音中，感到生活經歷帶給人不同的磨練。我想起音樂的起伏：「志偉，要繼續玩音樂啊！」「會呀。音樂本身已經喺我哋每個人嘅生命裡面，等我哋去發掘。只要我哋返去嗰個自然和諧嘅狀態，追求美，就搵到啦！」
好一次簡單愉快的聊天，心裡感恩，「好好享受音樂啊！祝你演出成功！」志偉燦爛一笑：「多謝！多謝！」
