日期：2020年10月25日
媒體：東方日報
酷愛繪畫藝術嘅香港展能藝術會副主席梁胡桂文，每隔五年就會舉辦一次個人展覽，而早前佢就喺中環大會堂舉行第六次個人展。雖然展期只得短短三日，但參觀賓客都話相當難忘，原因係梁太嘅畫作既是傳統中國水墨，又融會現代抽象筆觸，其妙手丹青更成為佢身上長衫嘅圖案，可謂完美咁演繹「穿上身的藝術」。
要將繪畫作品着上身，梁太話喺長衫上面揮筆雖然係最直接嘅方法，但缺點係難以洗滌，若只得一次穿着機會未免太可惜，於是將繪畫作品移印往長衫嘅布料就成為必然選項。梁太話雖然有手機應用程式，可以預視畫作套用於衣物嘅效果，但去到落實之時，先至發覺困難重重，譬如畫作嘅解像度不但要夠高，其尺寸亦要同布匹嘅封度相若，但最頭痛嘅係，只得幾碼布嘅訂單，一般布匹行根本唔會承接。但幸好得到朋友嘅幫助，先至可以將三幅畫作印上布料繼而製成三套長衫，同時又將餘下嘅布料，手工縫製多個手袋義賣，為香港展能藝術會籌募款項，以支持傷健人士發展藝術潛能。
陳淑芝：設計長衫應避免拉鏈
長衫薈會員陳淑芝（Cammie），向來都有留意梁太嘅畫作。Cammie指梁太將中國水墨同抽象構圖糅合，大膽突破傳統框架，中西合璧得相當調和。近來有意發展長衫品牌嘅Cammie話，要融會傳統與現代，並非將一大堆元素東拼西湊，而係有所取捨。譬如佢自己設計嘅長衫無論如何西化，都避免採用拉鏈呢種近代至出現嘅衣飾部件，至於傳統長衫有襟、有領、有衩等三項元素，就必須予以保留。
文化力量秘書長伍婉婷（Yolanda），就指長衫既係傳統衣着，就必有其固有標準，譬如長衫開衩嘅高度，係以觸及垂手指尖為限。不過Yolanda又話，為咗推動長衫常服化、現代化、時尚化同年輕化，標準若放寬一下，可利於普及為類似長衫嘅現代服飾。佢認為傳統同現代，兩者並非排斥，而係可以互存咁話。
