【AM730】反轉春夏秋冬

日期:2015年4月23日
報章:AM730
按此連結原文剪報圖像

 

春季生機處處,紅紅綠綠的;夏季充滿活力,大概是藍色;秋季遍野枯葉,理應是黃色的;冬季萬物休養生息,那是灰色的。一年四季循環不息,前人把它定為春夏秋冬,但世事總有例外,脫軌之事時有發生。天生沒有雙臂的口足畫家盧佩鏞,就以《春甜》、《夏酸》、《秋苦》及《冬辣》4幅畫作來告訴我們,她那意料之外的一生。

 

樂觀傻大姐

「我刻意用暗沉的橙色代表春天,灰色代表夏天,綠色代表秋天,再用黃色代表冬天。天氣轉變好似係定理,但亦有時候脫軌,人生亦一樣,你以為人天生應該有雙手?我偏偏冇。你以為冇手就生存唔到?我偏偏活得比你好。」佩鏞笑道。四肢健全似乎是與生俱來,她卻是被上天選中、萬中無一的勇者,雖然天生沒有雙臂,個性卻樂天知命,說話言簡意賅,自信滿滿。「自細就用腳打理日常生活,用腳畫畫就好似生活一部分。細個對畫嘢冇咩興趣,直到中五會考想報考美術科先開始正式學。」佩鏞指,從沒想過可以成為畫家,笑言要歸功大膽和樂觀的個性,「我好多時都覺得件事會正面發展,成日心諗:應該唔會咁差嘅!有少少傻大姐咁囉!」的而且確,跟佩鏞聊天感覺親切,全因她臉上的笑容從不褪色且表情多多,「其實我細個好自卑,覺得人哋咩都係用手就輕易做到,但我就好辛苦咁用腳都未必做到,後來因為有咗信仰先學識釋懷。」她續說:「屋企人早就接受我係有先天缺憾,佢哋令我嘅成長過程好愉快,令我可以有更多可能性,面對未來都唔使驚。」但佩鏞指,日常生活難免遇到歧視,「有時喺餐廳搭枱食飯,對面位會好大反應,試過有人要求換枱。其實可以諒解嘅,俾著係我,可能都會望多兩眼,但有啲人嘅目光真係好唔友善。」她笑言,要是現在遇到同類情況,會以凌厲眼神回敬。

 

挑戰塑膠彩

人人有一套生存模式,但總有些無形的規則像是必然要遵守,例如用手食飯或者用腳行路。佩鏞明白自己有別於常人,但艱苦的,從來不是來自用腳自理的體力勞動,反而是為生命重新建立新模式,「即使係拎起隻杯咁小嘅事,用邊隻腳最方便,點拎先最好,每樣嘢都要靠試,好在我夠樂觀,跌倒又可以企番起身。」她強調,樂觀是來自她的勇敢:「我真係咩都夠膽試,連媽咪都笑我,今次又搞邊科!畫畫都係,之前畫開水墨畫,後來轉畫塑膠彩,係兩種完全唔同嘅嘢,水墨多數畫下山水,抒發情感,但塑膠彩就著重於message。」佩鏞指,改變畫風對畫家而言需要極大勇氣,她雖然沒有雙手,卻用笑容迎來挑戰,「當時其實畫水墨畫已經去到樽頸位,我覺得自己好似停咗喺度。係因為人長大咗!以前畫山水好似用來紀錄咁,記低一啲覺得好靚嘅畫面,但依家就更想用畫嚟表達內心,將自己嘅諗法表達出嚟,同其他人分享。」佩鏞習畫快將踏入20個年頭,師承同為口足畫家的陳慧老師,由於近年畫風改變,3年前轉而隨趙錦成學習以塑膠彩繪畫,「要特別多謝趙老師,因為轉畫風係我半世人其中一個轉捩點,佢教識我點樣用畫表達自己想講嘅嘢,將我帶到另一個層次。」