【東方日報】梁美芬外訪 硬銷立會紀念品

日期:2019年4月28日

媒體:東方日報

 

下載新聞原圖

 

立法會售賣嘅紀念品曾經滯銷,直到二○一八至一九年度銷售量先至有所增長,令立法會紀念品店轉虧為盈。早前曾就立法會紀念品店營運情況提出過書面提問嘅梁美芬,最近外訪時就揹咗一個立法會出售嘅小背包,仲話係佢嘅「戰友」。佢咁硬銷立法會嘅紀念品,唔通仲擔心緊佢哋賣唔出?

 

梁美芬日前跟立法會訪問團去上海同杭州,佢都有帶埋「戰友」兼「旅伴」,而佢形容嘅「戰友」兼「旅伴」就係一個背包。呢個背包上面有色彩鮮艷嘅圖案,仲有同立法會嘅「立」字標誌添。其實個背包係立法會出售嘅紀念品,佢話平時喺香港都有用,貪佢既輕便,又可以放好多嘢,而且仲有小小防水功能喎。

 

與社企合作推出
梁美芬又介紹呢個背包嘅圖案係出自國際知名嘅展能藝術家廖東梅嘅畫作,而呢位藝術家出生便患腦痙攣。今次立法會同社企合作推出領帶、絲巾、公文袋同背包共四款紀念品,圖案均取材自廖嘅畫作。佢又自爆同廖相識咗好多年,所以呢一系列產品對佢嚟講特別有紀念價值,故此特意推薦畀大家咁話。