【東方日報】中環出更:膺十大傑青 歐鎧淳冀港人自強

日期:2020年10月4日

媒體:東方日報

 

新聞原圖

 

第四十八屆「十大傑出青年選舉」結果尋日出爐啦,今年一共有七個人獲獎,當中包括有「美人魚」之譽嘅香港游泳隊代表歐鎧淳(淳淳),原來佢細細個就諗過自己會做傑青,依家真係攞咗獎咪即係得償所願囉。之但係,淳淳雖然見過唔少大場面,但當佢獲得提名一刻,心情非常緊張,好彩有前輩鼓勵,先至鼓起勇氣接受面試咋。


淳淳又話,明白疫情困擾之下好多人都覺得好攰,但佢勉勵港人要堅持不懈,認為只要堅持信念,就一定可以重新振作咁話。至於本身係早產嬰嘅兒科醫生曹蘊怡就話自己七歲嘅時候,懷胎六個月嘅媽媽不幸早產,仍未足月嘅細佬亦無法保全。呢件事令到曹蘊怡覺得好震撼,仲話由嗰刻起,下定決心要做一個兒科醫生,要令好似細佬咁嘅嬰兒「救得一個得一個」。


曹蘊怡憶述媽媽早產之前,本來係打算隨同家人前往美國探望身體狀況欠佳嘅姑婆,雖然出發前醫生都話可以遠行,但最終都係出事,仲因為趕唔切去醫院而要係廁所分娩,而細佬亦救唔番。不過,做咗兒科醫生咁多年,曹都話好鍾意同小病人玩,有時唔開心,佢哋反而係自己嘅動力來源。


視障女高音 正能量感染他人
另一個新出爐傑青蕭凱恩(Michelle)就係一名全盲嘅視障女高音,佢因為三個月大時確診眼癌而要切除雙眼,但佢並冇因此而氣餒,多年嚟一直追逐自己嘅音樂夢。Michelle話有一位同樣患有眼疾嘅師妹,覺得自己多餘無用,方向全失,於是Michelle就用番自己嘅視障去鼓勵師妹,話「我全失明啦,你仲睇得多過我,所以我得你都得」,之後師妹亦受到佢嘅開解,依家都可以喺台上唱歌。


Michelle話好開心可以用正能量感染人,仲話只要相信自己就咩都做到添。至於傑青選舉嘅評審之一、國際青年商會香港總會會長鄭永翔就話,今次傑青嘅得獎者都喺自己領域有出色表現,以及有能力貢獻社會嘅人,仲話香港仍然係一個富有人情味同正能量嘅社會,希望大家可以繼續發揮互助精神。


另外四名獲獎者包括吳家榮、陳柏熹、周世傑和容祖兒。


卓妮