【明報】(Emily)「係人都病啦，有咩大不了」 伴侶一句話 助力踢走情緒病

日期：2022年10月10日

媒體：明報

按此連結細閱新聞

【明報專訊】「係人都病啦，有咩咁大不了？」情緒病康復患者Alice同老公拍拖無耐，就覺得要同佢坦白自己有思覺失調同抑鬱症，結果得到呢個一世都會記得嘅回應。有老公嘅支持，Alice可以透過創作抒發感受，亦願意企出嚟分享自己嘅經歷，噚日仲拎埋獎。

精神健康基金會噚日頒發「2022十大精神健康之星」獎項，表揚同肯定復元人士及照顧者，Alice係其中一個得獎嘅復元者。20幾年前，Alice考預科時因為轉校、學業壓力、家庭關係出現問題而覺得抑鬱，有輕生念頭，雖然有聽身邊人講去睇醫生，不過食完藥覺得冇乜用，之後就冇再理。

過咗兩年，Alice開始返第一份工，有一日同事買咗份早餐畀佢，佢就開始好驚，驚個同事會喺份早餐加料害佢，佢之後同咗屋企人講，就再去睇精神科醫生，呢次就確認患上思覺失調。呢段時間，Alice成日都會有幻聽，聽到有把聲音叫佢去自殺，經過治療後，呢啲聲音就少咗七至八成。